PRONOMES RELLATIVOS

Unen duas cláusulas, de las cualas la segunda califica a la primeira. Nunca nun llevan tilde:

Que, el que, la que, lu que, los que, las que, el cual, la cuala, lu cual, los cuales, las cualas, quien, quienes, cuyu, cuya, cuyos, cuyas, onde.

- Que: Puede referise a presonas ou cousas y autúa cumu suxetu ou complementu de la sua cláusula:

L'home que vinu yera'l mieu collaciu. (complementu)
L'home, que taba añudíu, sentouse na siella. (suxetu)

- El que, la que, lu que, las que, los que: Úsanse pa nun repitir un nome yá mencionáu:

¿Cúmu yeran las muyeres? Las que taban eiquí yeran mui guapas.

- El cual, la cuala, lu cual, los cuales, las cualas: Tienen una función paecida a que ou a el que, la que, lu que, los que, las que autuando cumu suxetu, peru dandu a la oración un sentíu más formal:

L'home, el cual taba añudíu, sentouse na siella.
La muyer taba gueyándulu, lu cual prestouye asgaya.

- Quien, quienes: Pueden sustituyire a que ou a el cual, la cuala, los cuales, las cualas cuandu autúan cumu suxetu y refiérense a presonas:

L'home, quien taba añudíu, sentouse na siella.

- Cuyu, cuya, cuyos, cuyas: Amuesan posesión:

L'home, cuyu perru taba na puerta, pidioume augua.
L'home cuyu perru taba na puerta pidioume augua.

Estas duas oraciones sírvennos pa remarcare la desemeyanza na sinificancia de dambas, algu mui habitual nas oraciones cun rellativos.
Na primeira sábese que namás nos referimos a un home. El feichu de dicire que tenía un perru ye una aclaración que podríamos quitare ensín que camudara el sentíu principal: L'home pidioume augua.
Na segunda paez qu'hai deillos homes y fou el que tenía un perro na puerta el que me pidióu augua; los outros non.

- Onde: Ye un pronome rellativu de llugar y puede sere sustituyíu pur en que, nel cual, na cual, nos cuales, nas cualas.

La casa onde vivía nun yera de miéu / La casa na cuala vivía nun yera de miéu.